Ирмос: Ты моя́ кре́пость, Го́споди, Ты моя́ и си́ла, Ты мой Бог, Ты мое́ радование, не оста́вль не́дра Отча и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколюбче.

Ты моего́ се́рдца ра́дование, Богоро́дице, держа́ва моя́, похвала́ и свет, Ты утеше́ние мое́, сла́ва и удобре́ние, дыха́ние же и сла́дость, весе́лие мое́, пи́ща и наслажде́ние.

От скве́рных приими́ усте́н хвалу́, Свята́я Отрокови́це, и прибе́жище нело́жное бу́ди ми обли́чену и очисти́лище, и изба́ви а́дова го́рькаго осужде́ния, моли́твами Твоими, Богора́дованная.

Еди́на ве́рных гото́вое поможе́ние, по́мощи нам ру́ку простри́, и побо́рствуй ску́дости на́шей во вре́мя бра́ни, со гла́сом благодаре́ния мо́лим Тя, я́ко да непреста́нно те́плое Твое́ воспева́ем заступле́ние.

Покори́выйся е́же де́яти зла́я, приидо́х от де́лания во обы́чай, от обы́чая же в похоте́ние просто, от похотения в одержа́ние достигох; одержа́ние же, я́ко естество належа́ще второе, обы́чая а́ки долга взыску́ет, Пречистая.