Ирмос: Ужасо́шася вся́ческая о Боже́ственней сла́ве Твое́й: Ты бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, всем воспева́ющим Тя мир подава́ющая.

Яко небе́сная Ле́ствица яви́лася еси́ пра́отцу дре́вле Иа́кову, е́юже у́мове к виде́нию Бо́га

восхо́дят и па́ки низхо́дят к земли́, покланя́ющеся любо́вию Твоему́ неизрече́нному рождеству́.

Жезл яви́ процветы́й Тя, Всечи́стая, цвет красе́н и благоуха́нен, Ты бо Бо́га неизглаго́ланно родила́ еси́, Имже тли избега́ют ве́рнии, покланя́ющеся любо́вию Твоему́ неизрече́нному рождеству́.

Ви́де Тя дре́вле, Нескве́рная, я́ко сви́ток Боже́ствен в Бо́зе су́щий проро́к, в не́мже Сло́во Отчее на ра́дость ми́рови внутрь написа́ся, и спасе́ я́ко Бог ве́рою покланя́ющияся Твоему́ неизрече́нному рождеству́.

Не возмога́ет язы́к челове́ч николи́же воспе́та досто́йно Тя, Богоро́дице; те́мже си́лу, Чи́стая, даждь ми произволе́нию равноста́тную, я́ко да любо́вию воспою Твое́ неизрече́нное рождество́.