Ирмос: Ужасни́ся боя́йся не́бо, и да подви́жатся основа́ния земли́: се бо в мертвеца́х вменя́ется в вы́шних Живы́й, и во гроб мал странноприе́млется. Его́же о́троцы благослови́те, свяще́нницы воспо́йте, лю́дие превозноси́те во вся ве́ки.

Огненный, ра́дуйся, сто́лпе, род наш от тьмы к све́ту путеводя́й; ле́ствице, ра́дуйся, небесная; ра́дуйся, свещниче всезлатый; ра́дуйся, Дево, предста́тельство си́рых, плене́нных изба́ва и в бу́ри су́щим приста́нище; ра́дуйся, души́ моея́ сла́во и весе́лие.

Ши́пок ро́ждшая Христа́, ра́дуйся, Всепе́тая, благоуха́ния бо та́инственнаго вся испо́лнила еси́; ра́дуйся, всезлата́я ста́мно Ма́нны живо́тныя; ра́дуйся, Божественное прия́телище, Господоимени́тая Отрокови́це, мона́шествующих покро́ве; ра́дуйся, души́ моея́ сла́во и весе́лие.

Го́ру прови́де Тя Дании́л, Всечестна́я, от нея́же ка́мень жи́зни неизглаго́ланно Христо́с произы́де, и и́дольская тре́бища сокруши́ си́лою Божества́; ра́дуйся, высото́ разуме́ния; ра́дуйся, глубино́ му́дрости; ра́дуйся, души́ моея́ сла́во и весе́лие.

По́лче всех ве́рных, придаи́те сни́дитеся, и Влады́чицу на́шу, неизрече́нно сло́вом во пло́щшую Всетворца́, воспойм, взыва́юще: ра́дуйся, прибе́жище всех и наде́ждо спасе́ния; ра́дуйся, души́ моея́ сла́во и весе́лие.