Ирмос: Внача́ле небеса́ всеси́льным сло́вом Твоим утвержде́й, Го́споди Спа́се, и вседе́тельным и Бо́жиим Ду́хом всю си́лу их, на недви́жимем мя ка́мени испове́дания Твоего́ утверди́.

Воздая́й до́лги раболе́пно и доброразсу́дно благода́тей Твоих, Влады́чице, те́пле Тя воспева́ю, Ма́ти Нескве́рная Сло́ва, всех Изба́вителя; но и ны́не изми́ мя я́же в житии́ обстоя́ний.

Умерщвле́на Ада́ма преслуша́нием дре́вле, лу́чшия жи́зни, Живонача́льное Сло́во ро́ждши, Влады́чице, яве сподо́била еси́, но и ны́не мя от сме́рти грехо́вныя свободи́.

Вы́ю вознося́й всестра́стный пло́ти зако́н, ны́не угнета́ет зако́н духо́вный, и к лютым ум мой, Всенепоро́чная, по́хотем сре́ет[87]; но безстра́стия мир ско́ро пода́ждь ми Твоими моли́твами.

Несказа́нно во чре́ве Содержи́теля всех за- че́нши Христа́, Всечи́стая, земноро́дных существо́ разреши́ла еси́ от а́дова одержа́ния; но и ны́не многоплете́нныя се́ти зави́дящих мя растерза́й.