Ирмос: Взако́не се́ни и писа́ний о́браз ви́дим ве́рнии: всяк му́жескии́ пол, ложесна́ разверза́я, свят Бо́гу; тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

На ми́лостивное Твое́ взираю́ще о́ко, пое́м от души́: поми́луй вся благоутро́бием Твоим, Ма́ти Бо́жия, Боже́ственную Твою́ покажи́ благода́ть чту́щим Тя ве́рно, я́ко да вси в пе́снех сладкопою́ще Тебе́ велича́ем.

Зря́щи, Чи́стая, раба́ Твоего́, ве́рно Тя лю́бяща, в ско́рбех помози́, в ну́ждах заступи́ те́пле, во обстоя́ниих свободи́ и в напа́стех изба́ви; Ты бо ми́ру покро́в и ро́ду на́шему поможе́ние.

Троичен: Нерожде́нный Све́те пресве́тлый, Отче Боже́ственный и Изводи́телю, Сы́не Оте́ч и Сло́ве, рожде́йся я́ко от Све́та Свет, и Ду́ше нетва́рный Боже́ственный возсия́вый исхо́дне, Тро́ице Еди́нице Бо́же мой, вся сохраня́й си́лою Твое́ю.

Свы́ше Твое́ заступле́ние, Чи́стая, и нам низпосли́, де́тельное моле́ние Твое́ всем распростри́, да́руй исцеле́ний благода́ть и чуде́с мно́жество, да вси Тя чтим и непреста́нно велича́ем.

Стихиры, глас третий. Подобны:Стра́стию Твое́ю, Христе́:

Ра́дуйся, Живота́ Ма́ти; ра́дуйся, Присноблаже́нная, а́нгелов всебога́тное зре́ние и земноро́дных, ра́дуйся, похвале́; ра́дуйся, ра́дость челове́ком источи́вшая, Влады́чице.

Ра́дуйся, Всенепоро́чная, Це́ркве Христо́вы скраниа́ма поко́й и проше́ний ея́ подъя́тие; ра́дуйся, мы́сленная врата́, и́миже Вы́шнии́ про́йде.

Ра́дуйся, добро́то Иа́ковля, Юже Влады́ка возлюби́; ра́дуйся, заре́, нося́щая Со́лнце;

ра́дуйся, от тле́ния челове́ки Изба́вльшая рождество́м Твоим.

От вся́каго прило́га проти́вна и ско́рби, и от враг лю́тых, Всенепоро́чная, рабы́ Твоя́ свободи́; Тя бо держа́вное предста́тельство стяжа́хом.