От Бо́га Бо́га Сло́ва, неизрече́нною му́дростию, прише́дшаго обновити Ада́ма, я́дию в тле́ние па́дшаго лю́те, от Святы́й Де́вы неизрече́нно воплоти́вшагося нас ра́ди, ве́рнии, единому́дренно пе́сньми велича́ем.

Яко сострада́тельна су́щи, Де́во, сострада́тельнейша Сло́ва ро́ждшая нам с пло́тию, Сего́

при́сно моли́ изба́вити бед, скорбе́й и ины́х искуше́ний Чи́стую Богоро́дицу ве́рою Тя сла́вящия.

Ааро́нов жезл пре́жде и ста́мна ма́нны, све́щник и злат киво́т Тя прообразова́ху, Богоневе́сто; и́хже мы сбытие́ досе́ле ви́дяще све́тло, Богоро́дицу госпо́дственне ве́рою сла́вим.

Исто́чник, ве́рным пролива́яй то́ки спасе́ния, нарица́ем Тя, Чи́стая, зане́ иста́явше зно́ем безме́рных грехо́в, мно́гую обрето́хом отра́ду Сы́на Твоего́ Кровь, е́юже ны назда́л есть.

От зе́млена у́бо существа́ Ада́мова возросла́ еси́ я́ко ветвь, Богома́ти, Цвет же, еди́ная, Го́спода прозябла́ еси́, земноро́дна де́лателя кроме́; сего́ ра́ди вси в пе́снех Тя велича́ем.

Стихиры, глас вторый. Подобны:Егда́ от дре́ва:

Ра́дуйся, ши́ршая небе́с; ра́дуйся, Де́во, сил го́рних превы́шшая; ра́дуйся, Чи́стая, вселе́нныя всея́ Влады́чице; ра́дуйся, уде́ле Святы́й Бо́га Вы́шняго; ра́дуйся, мо́сте Боже́ственный, ме́ртвыя преводя́й к животу́ нестаре́ему; ра́дуйся, спасе́ние ми́ра; ра́дуйся, ве́рных всех похвало́.

Ра́дуйся, всеми́рная ра́досте; ра́дуйся, Ла́стовице сладча́йшая, ве́сну весе́лую всем возси я́вшая су́щим в зиме́ зол; ра́дуйся, свеще́ негаси́мая, во мра́це преле́стнем богоразу́мия свет облиставшая; ра́дуйся, цареи́ державо; ра́дуйся, кре́пкое предста́тельство ве́рно блажа́щих Тя.

Ра́дуйся, у́мнаго не́ба свети́ло седми зве́здное ве́лие и сла́вное, благода́тьми седмию облиста́ющая, недви́жимою же моли́твою Твое́ю, я́ко други́м по́лусом[30]я́же в нощи́ жите́йскаго мо́ря плыву́щия к приста́нищу Небе́снаго Ца́рства наставля́ющая, и све́том сла́достным Твоим просвеща́ющая.

Приими́ моле́бную песнь, приими́ плач мой, Де́во, приими́ проше́ние, сле́зы и души́ воздыха́ние; рыда́ние упраздни́, сле́зы ути́ши, печа́ли вся на ра́дость преложи́, пода́й ми взыска́ющу покро́в Твой и заступле́ние всеси́льным ма́нием Твоим, Богоневе́стная.