Ирмос: Едине ве́дый человеческаго существа́ не́мощь и ми́лостивно в не́ вообра́жся, препоя́ши мя с высоты́ си́лою, е́же вопи́ти Тебе́: Свят одушевле́нный Храм неизреченный сла́вы Твоея, Человеколюбче.

Покро́ве и избавле́ние на́ше, стено́ и держа́во благохва́лящих Тя, Многопе́тая, вся́ческих мя изми́ скорбе́й и обстоя́ний жите́йских, вы́ну соблюда́ющи, я́ко да сла́влю Тя.

Влады́чице ми́ра Блага́я, еди́наго Щедролюбца, благоутро́бия иму́ща пучи́ну и воплоти́вшася от всенепоро́чных Твоих крове́й, умоли́ уще́дрити мя, безме́рными содержи́ма злы́ми.

Иму́щи состра́стие мно́гое и утро́бы любощедро́т и па́че ума́ благосты́ню, на мне сия́, Всенепоро́чная, покажи́, к Тебе́ притека́ющем, и согреше́ний безчи́сленных ми оставле́ние да́руй.

Утро́ба Твоя́ яви́ся воистинну, Присноде́во Мари́е, ши́ршая небе́с, вмести́вши Царя́ и Творца́ всего́, вся́кою тва́рию невме́стна, си́лою Его́ Божества́.