Ирмос: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: «Благослови́те, вся дела́ Госпо́дня, Го́спода и превозноси́те во вся ве́ки».

Ста́мну злату́ю и све́щник, трапе́зу и жезл, Бо́жию го́ру и о́блак, черто́г Царе́в и пре́стол огневи́дный Тя ве́рнии вси имену́ем, по рождестве́ Де́ву соблю́дшуюся.

Яко крин, Чи́стая, Тя узре́в кри́ны се́льныя украси́вый Сло́во, и от тернови́дна взем естества́, из Тебе оде́ждею облека́ется. Те́мже зову́: на́га мя всего́ облецы́, да воспева́ю Тя во вся ве́ки.

От Тебе́ рожде́йся Иже вся нося́й Бог Сло́во глаго́лом Своим, Тобо́ю очище́ние прегреше́ний дае́т, те́мже Ти зову́: спаси́ на суде́ мя, Влады́чице, я́ко да Тя воспева́ю во ве́ки.

Зако́ну ума́ приража́яся моего́, противора́тствуяй пло́ти зако́н пра́выми Сы́на Твоего́ путьми́ хоте́ний Боже́ственных отвраща́ет ходи́ти. Те́мже молю́: Твоим хода́тайством, Отрокови́це, управи мя.