Ирмос: Иже в концы́ веко́в доше́дшия, Человеколюбче, и треволне́ньми напа́стей поги́бнути бедствующия, вопиющия не пре́зри: спаси́, Спа́се, я́коже спасл еси́ от зве́ря проро́ка.

Храм и дверь, све́щник, киво́т, заве́са и жезл и ски́ния, земля́ свята́я, Боже́ственная трапе́за и мост, Ле́ствица, престо́л, черто́г и пала́та Бо́жия яви́лася еси́, Де́во.

Добру́ и кра́сну Тя, Де́во, добро́тою кра́сный Госпо́дь па́че сыно́в земноро́дных, Чи́стая, обреты́й, возсия́ я́ко Со́лнце кра́сно, я́ко от черто́га Жени́х, Твоего́ нетле́ннаго чре́ва.

Ди́вный во святы́х удиви́ Тя, Влады́чице, ди́вное я́ко вои́стинну небесе́ и земли́ та́инство! Те́мже Твоя́ ми́лости ны́не на мне удиви́, ми́лости тре́бующем.

Яже смире́нное естество́ челове́чо возвы́сившая, и ни́щия возста́вльшая от земли́, и убо́гия от гно́я страстей воздви́гшая, от пе́рсти зол, Всенепоро́чная, воздви́гни мя.

Седален, глас третий. Подобен:Боже́ственныя ве́ры:

Стену неразори́му, кре́пкое основа́ние, приста́нище непотопля́емо Тя стяжа́вше, Всепе́тая Влады́чице, и́же в пучи́не обурева́емии страсте́й, к ти́хому заступле́нию Твоему́ прибега́юще ве́рно, тишины́ улуча́ем.