Ирмос: КТебе́ у́тренюю всех Творцу́, преиму́щему всяк ум ми́рови; зане́ свет повеле́ния Твоя́, в ни́хже наста́ви мя.

Ра́дуйся, Све́та Невече́рня вмести́лище; ра́дуйся, Чи́стая, боля́щих цельба́ и врачевство́ невеще́ственное; ра́дуйся, Всесвяще́нная, Боже́ственный хра́ме Влады́чень.

Ра́дуйся, ски́ние ши́ршая о́блак, златоза́рное прия́телище Вы́шняго; ра́дуйся, Всепе́тая; ра́дуйся, ми́ро честно́е и кади́ло всеблагово́нное.

Ра́дуйся, ве́рных неруши́мая стено́, держа́вное ми́рови заступле́ние; ра́дуйся, Пренепоро́чная; ра́дуйся, всех утвержде́ние пою́щих Тя, Богоневе́сто.

Све́тлое Влады́чне прия́телище, ра́дуйся, Чи́стая, па́дшаго Ада́ма еди́но исправле́ние, и Евиных избавле́ние слез, ра́дуйся, Всечестна́я.