Ирмос: Ри́зу ми пода́ждь све́тлу, одея́йся све́том я́ко ри́зою, многоми́лостиве Христе́ Бо́же наш.

Пе́ти непреста́нно Бо́га до́лжни есмы́ се́рдцем и усты́, но уны́нием содержи́мся, Де́во.

Бед многоплете́нных и лю́тых, Чи́стая, и обстоя́ний, ны́не печа́лящих мя, изми́ окая́ннейшаго раба́ Твоего́.

Вчас сме́рти моея́ по́мощь яви́, Нескве́рная, и бесо́в изба́ви лука́вых, и́щущих восхи́тити мя.

Пости́мся, я́ко вре́мя и́мамы, пла́чимся, вопие́м, да наслади́мся та́мо и ве́чная возлику́ем.

Седален, глас осьмый. Подобен:Воскре́сл еси́ из гро́ба:

Сло́во Отчее в мир сни́де, и а́нгел све́та Де́ве возопи́: «Ра́дуйся, Благослове́нная, де́вство еди́на соблю́дшая; ра́дуйся, заче́ншая Преве́чнаго Бо́га и Го́спода, да спасе́т от пре́лести, я́ко Бог, род челове́ческий».