Ирмос: Во глубине́ постла́ иногда́, фараони́тское всевоинство преоруже́нная си́ла, вопло́щшееся же Сло́во всезло́бный грех потреби́ло есть; препросла́вленный Госпо́дь, сла́вно бо просла́вися.

Амвроси́и ми́рови пи́щу, ра́дуйся, источи́вшая, Богороди́тельнице; ра́дуйся, раю́, жи́зни прозя́бнувый Дре́во, Влады́чице, Еже и зре́ти сподо́би и наслади́тися вся ве́рно пою́щия Тя.

Ца́рство Небе́сное, ра́дуйся, ве́рным пода́вшая рождество́м, Богороди́тельнице, неизрече́нным Твоим; ра́дости ве́чныя нас сподо́би, Всечи́стая, е́же «ра́дуйся» вопи́ти Тебе́, Обра́дованная, хода́тайствы Твоими.

Ве́село «ра́дуйся», Чи́стая, неопа́льная купино́, любо́вию Ти зову́щим Помо́щница бу́ди Твоими мольба́ми, и нас от лука́внующих стремле́ния свободи́, Всеблагослове́нная.

Недосто́йных внемли́ моле́бник Твоих сле́зным моли́твам, выну вопию́щих Ти, Все свята́я: ра́дуйся, Боже́ственная трапе́зо, Хлеб нося́щая жи́зни, Его́же наслади́тися пода́ждь нам моле́нии Твоими.