Ирмос: Го́споди, Бо́же мой, от но́щи у́треневав, Тебе́ молю́ся: пода́ждь ми оставле́ние прегреше́ний моих и к све́ту Твоих повеле́ний пути́ моя́ напра́ви, молю́ся.

Услы́шах проро́ка, «на вся́ку нощь», ре́кша, «измы́ю слеза́ми посте́лю мою́»[85], и изуми́хся, сего́ ра́ди ве́рою, Всесвята́я, зову́: даждь ми слез то́ки, е́же спасти́ся.

Ум, ду́шу и те́ло омертви́х, Отрокови́це, грехо́м, возста́ви, молю́ся, ум мой на покая́ние, на труды́ досто́йныя те́ло, да веселя́ся велича́ю Тя.

Одожди́ ми́лости ка́плю ми, Де́во Богороди́тельнице, и грехи́ моя́ мно́ги изгла́ди, язв стру́пы и о́бразы тех в коне́ц потребля́ющи.

Истека́ют помышле́ний нечи́стых то́ки от всеокая́ннаго се́рдца моего́, и испуща́ют уму́ злосмра́дие, но сия́ изсуши́, Богома́ти, молю́ Тися.