Ирмос: Ева у́бо неду́гом преслуша́ния кля́тву всели́ла есть; Ты же, Де́во Богоро́дице, прозяба́нием чревоноше́ния ми́рови благослове́ние процвела́ еси́, тем Тя вси велича́ем.

При́зри на моле́ния раба́ Твоего́ и вско́ре предвари́, Чи́стая, оскорбля́ющих и зло́бующих враг неви́димых мя изба́ви, и спаси́ от нужд и скорбе́й и обстоя́ний многообра́зных.

Всего́ мя ра́нами грехо́вными уя́звлена и боле́знующа, Всесвята́я Де́во, исцели́ и лука́вых помышле́ний изба́ви, Яже Сло́ва Всеси́льна ро́ждшая, Блага́го же и Человеколюбца.

За па́дшаго пре́жде Ада́ма в сме́рть сме́рти приобщи́ся Иже живото́м и сме́ртию влады́чествуяй Твой Сын, Преблага́я; те́мже мя от страсте́й паде́ния Твоими мольба́ми возста́ви.

Спаси́, Богоро́дице, к Тебе́ прибега́юща от беды́ и напа́стей, от греха́ и бу́ри плотски́х страсте́й, и волне́ния, и обстоя́ний жите́йских, и бу́дущаго осужде́ния.

Стихиры, глас четвертый. Подобны:Дал еси́ зна́мение:

Ра́дуйся, чисте́йшая пала́то Царе́ва; ра́дуйся, Неве́сто Непоро́чная; ра́дуйся, купино́ неопа́льная; ра́дуйся, Боже́ственный кро́ве и всех предста́тельство; ра́дуйся, нескве́рная ски́ние; ра́дуйся, Влады́чице всея́ тва́ри; ра́дуйся, злата́я кади́льнице; ра́дуйся, всечу́дная Госпоже́; ра́дуйся, раю́ Боже́ственный, Дре́во живота́ из расти́вый.

Ра́дуйся, Безневе́стная Ма́ти, Вы́шняго честне́йшее и златоза́рное пребыва́ние; ра́дуйся, Боже́ственная стено́, Неискусому́жная Отрокови́це; ра́дуйся, свети́льниче све́тлый; ми́ра всего́, ра́дуйся, избавле́ние; ра́дуйся, цве́те ве́ры, мучителеи́ де́рзость си́лою необори́мою Твое́ю благомо́щно Разо́ршая.

Ра́дуйся, всенепоро́чная Агнице Христа́ Архипа́стыря; ра́дуйся, исто́чниче приснотеку́щий, амвроси́и точа́щ мсто[49]нектароуха́нное; ра́дуйся, мирополо́жнице у́мнаго Ми́ра злата́я, злосмра́дие облагоуха́ющая страсте́й; ра́дуйся, Неискусому́жная, честно́е а́нгелов украше́ние и челове́ков удобре́ние, ве́рно сла́вящих Тя.

Все упова́ние мое́, злополу́чный и окая́нный, на Тя возлага́ю, Пренепоро́чная Влады́чице, вседу́шным обраще́нием: не отве́ржи мене́ от лица́ Твоего́, ниже́ омерзи́ мя недосто́йна, ниже́ утро́бу Твою́ человеколю́бную затвори́ ми, Ма́ти Любоблага́я, зане́ ино́го не стяжа́х предста́тельства раб Твой.