Ирмос: Жезл из ко́рене Иессе́ова и Цвет от него́, Христе́, от Де́вы прозя́бл еси́, из горы́, Хва́льный, приосене́нныя ча́щи прише́л еси́, вопло́щься от Неискусому́жныя, невеще́ственный и Бо́же, сла́ва си́ле Твое́й, Го́споди.

Еди́ну Тя ве́рнии по Бо́зе наде́жду непосты́дну и предста́тельство и́мамы, Отрокови́це: Твоими мольба́ми изми́ ны вся́ческих враг ви́димых и неви́димых, вре́да и искуше́ний, да Тя непреста́нно сла́вим.

От ти́ннаго ви́да ум мой очи́стивши, раче́ния Бо́жия испо́лнен покажи́, Бо́жия глаго́лати при́сно, Бо́жия помышля́ти, Бо́жия приле́жно твори́ти дела́, я́ко да избе́гну стра́шный и ве́ч нующия му́ки.

Не стяжа́х ины́я на земли́ предста́тельницы и побо́рницы и стены́ необори́мый, ра́зве Тебе́ еди́ный Чи́стыя, Нескве́рная Богоро́дице. Ты бо мне наде́жда и спасе́ние, покро́в и по́мощь, и согреше́ний проще́ние.

Низложи́ де́рзость лука́вую врага́ и кова́рства я́же на мя наводи́мая, и облецы́ мя Твое́ю кре́постию, Всенепоро́чная, неуя́звена при́сно соблюда́ющи, це́ла и невре́дна ве́рою Тя почеству́ющаго.