Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя, Христе́, за́поведей Твоих утверди́, я́ко несть свят, па́че Тебе́, еди́не Человеколю́бче.

Слез моих ка́пли, се́рдца стена́ния и воздея́ния рук просте́ртых ми́лостивно испра́ви, и уще́дри раба́ Твоего́, и́бо ины́я не и́мам по́мощи ра́зве Тебе́, Влады́чице.

Тле́нное естество́ мое́ ве́дущи, Богоро́дице, всегда́ пополза́ющееся, увы́ мне, на го́ршее неуде́ржно, заступи́ и спаси́ мя, и́бо ины́я не и́мам по́мощи ра́зве Тебе́, Влады́чице.

Испыта́вый себе́, обрето́х всех челове́к зло́бами превозше́дша, и ка́мо бегу́? То́кмо к благоутро́бию Твоему́, окая́нный, и́бо ины́я не и́мам по́мощи ра́зве Тебе́, Влады́чице.

Наг и пуст есмь и вся́ческих до́брых лише́н, и́хже окра́ден бых, окая́нный, зле́йшим сове́том; те́мже к Тебе́ прибего́х, и́бо ины́я не и́мам по́мощи ра́зве Тебе́, Влады́чице.