Ирмос: Мо́ря чермну́ю пучи́ну невла́жными стопа́ми дре́внии́ пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л есть.

Еди́на во искуше́ниих и ско́рбех защища́ющая под кров Твой, Всесвята́я, прибега́ющих те́плейше, приими́, я́ко Преблага́я, е́же от се́рдца моего́ моле́ние.

Приста́нище обре́т Тя, неразу́мный, напа́стей же и бед прило́ги отрева́ющее, благода́рно Ти воспева́ю пе́ние, Присноде́во.

Ми́лостивым и благоприя́тным о́ком Твоим, Богороди́тельнице, во обстоя́нии и напа́сти содержи́ма зря́щи мя, ско́ро свободи́, Тя бо прошу́: помози́ мне.

Ева осужде́ния спасе́ся и Ада́м Тобо́ю, с ни́миже и аз припа́даю Ти, Чи́стая: печа́ли моея́ сле́зы на ра́дость преложи́ и от бед свободи́.