Ирмос: На кресте́ Твое́ Боже́ственное истоща́ние провидя Авваку́м, ужа́сся, вопия́ше: «Ты си́льных пресе́кл еси́ держа́ву, Бла́же, приобща́лся су́щим во а́де, я́ко Всеси́лен».

Пламеноно́сная клеще́ нескве́рная, наде́ждо ве́рных, оби́димых Предста́тельнице необори́мая, прииди́ и ны́не, изыма́ющи от беды́, я́же обдержи́т мя.

Бу́рею лю́тых грехо́в погружа́емь ны́не, Твою́ призыва́ю по́мощь, Всенепоро́чная: яви́ся, прииди́, изыма́ющи от беды́, я́же обдержи́т мя.

Ты ору́жием моле́ния Твоего́, Богоро́дице Чи́стая, сопроти́вных ссе́кши главы́, предста́ни ны́не, изыма́ющи от беды́, я́же обдержи́т мя.

Воздыха́ние мое́ виждь, Всечи́стая, виждь скорбь мою́, виждь уны́ние, и мно́гую Твою́ покажи́ на мне благода́ть, изыма́ющи от беды́, я́же обдержи́т мя.