Ирмос: Жите́йское мо́ре воздвиза́емое зря напа́стей бурею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Еди́ну Всепе́тую и до́брую в жена́х Богороди́тельницу, неруши́мую сте́ну христиа́н, Мари́ю Нескве́рную несумня́щимся се́рдцем ве́рнии ублажи́м.

Боговмести́мая ски́ние, свята́я горо́ Бо́жия, злата́я кади́льнице, престо́ле о́гнен, свети́льниче многосве́тлый, непроходи́мая врата́, ра́дуйся, Влады́чице.

Стра́нно Твое́ зача́тие, стра́нно, Отрокови́це, и стра́шно е́же па́че ума́ Твое́ рождество́, вся от Бо́га устра́ншияся Тому́ примири́вшее и добро́ту пре́жнюю возда́вшее.

Ублагости́, Влады́чице, ду́шу мою́, мно́гими озло́блену прегреше́нии, и Пода́теля всех благи́х Христа́ умоля́й Ца́рства вы́шняго мя сподо́бити.

Седален, глас шестый. Подобен:Мно́гая мно́жества:

Немощству́ющия моея́ души́ мно́гия боле́зни и телесе́ люте́йшия стра́сти, Чи́стая, посети́, и исцеле́ния ско́раго сподо́би, и святы́я за́поведи твори́ти ми благопоспеши́ Бо́га Блага́го, я́ко да Тя велича́ю.