Ирмос: Ма́нием Твоим на земны́й о́браз преложи́ся пре́жде удоборазлива́емое водно́е естество́, Го́споди; те́мже немо́кренно пешеше́ствовав, Изра́иль пое́т Тебе́ песнь побе́дную.

«Несть поро́ка в Тебе́, Де́ве Нескве́рнеи́, до́брая и непоро́чная еси́ вся», Влады́чице, дре́вле я́ко песнопоя́ рече́ Соломо́н, «и бли́жняя Творца́ Твоего́»[82].

Яко благово́нный ши́пок и крин честне́йший посреде́ удо́лий укра́шен обре́т Тебе́ Сло́во, созда́вый мир, всели́ся в Тя, Богоро́дице.

Обагри́ся от нескве́рных Твоих крове́й боготка́ная ри́за и порфи́ра ца́рская Сло́ву Влады́це всех, плоть одушевле́нна, Мари́е Всепе́тая.

Ты Соде́теля Твоего́ во чре́ве Твое́м прии́мши, без нетле́ния родила́ еси́, Бо́га Младе́нца бы́вша; стра́нное чу́до! Раба́ Ма́ти еси́ Влады́ки Безневе́стная.