Ирмос: Яже пре́жде со́лнца Свети́льника Бо́га возсия́вшаго, пло́тски к нам прише́дшаго из боку́ Деви́чу, неизрече́нно воплоти́вшая, Благослове́нная Всечи́стая Тя, Богоро́дице, велича́ем.

Приклони́ ко мне у́хо Твое́, Де́во, воспева́ющей, Препе́тая, похва́льными словесы́ рождество́ Твое́, и я́ко да́ры вдови́чи пе́ния усте́н прии́мши, испроси́ грехо́в мне проще́ние.

Сия́ет Твоя́ Боже́ственная добро́та, облиста́ет чистоты́ све́тлость, пресия́ет же сих Твое́ рождество́: Бог бо, со́лнца и тва́ри Зижди́тель, Сей от Тебе́ роди́ся, те́мже Тя вси велича́ем.

Яко цвет чистоты́ и де́вства жезл, и Бо́жию Ма́терь Тя в пе́снех блажа́ще, со гла́сом хвале́ния мо́лим: в де́встве нас утверди́ и в чистоте́ соблюди.

Те́ло и ду́шу Ти Де́ве сохра́ньшей нескве́рно, Царь Христо́с добро́ты возжеле́ Твоея, и Ма́терь воплоще́ния Своего́ показа́, Мари́е Пресла́вная, устроя́я мое́ спасе́ние.

Стихиры, глас вторый. Подобен:До́ме Евфра́фов:

Ра́дуйся, престо́ле Бо́жий, Всецари́це Мари́е, христиа́ном сла́во, де́вам похвало́, Неве́сто солнцека́плющая.

Ра́дуйся, ра́дость источи́вшая ми́рови, Пресвята́я Отрокови́це, челове́к же и а́нгел наро́читое украше́ние.

Ра́дуйся, Чи́стая, сосу́де небе́снаго ми́ра и цве́те нетле́ния; ра́дуйся, кри́не и ши́пок, облагово́нствуяй вся.

Всецарю́ Иису́се, умири́ мир моли́твами Ма́тере Твоей Всецари́цы Де́вы и всех святы́х Твоих.