Ирмос: Образу злато́му на по́ле Деи́ре служи́му, трие́ Твои о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: «Благослове́н еси́, Бо́же оте́ц на́ших».

Тя дверь у́мнаго уве́дев Восто́ка, я́вльшася с небесе́, о е́же вни́ти ми в небеса́, раб Твой, Тобо́ю, Де́во, молю́ся; те́мже приими́ мя, Влады́чице, светонаста́ви и путево́ждствуй.

Просвеще́ния исто́чник, из рая́ слове́снаго устремля́яся, всея́ земли́ напая́ет лице́, сла́дости ток невеще́ствен, Ду́ха Свята́го благода́ть, Всечи́стая, от Тебе́, ю́же и мене́ сподо́би прия́ти оби́льно.

Руно́ Гедео́ново иногда́ чре́во Твое́, Всепе́тая, прояви́, небе́сную ро́су прия́вшее, всех ороша́ющу жа́ждею держи́мых греха́; благослове́нна еси́, Бо́га пло́тию ро́ждшая.

На кресте́ Христо́с, Сын Твой, пригвозди́выйся во́лею, нача́ла тьмы обличи́ и сме́ртное разори́ могу́тство тлетво́рное; те́мже, Влады́чице Всесвята́я, стра́стная пло́ти моея́ мудрова́ния умертви́.