Ирмос: Вску́ю мя отри́нул еси́ от лица́ Твоего́, Све́те Незаходи́мый, и покры́ла мя есть чужда́я тьма, окая́ннаго? Но обрати́ мя и к све́ту за́поведей Твоих пути́ моя́ напра́ви, молю́ся.

Во́инства го́рних сил, Пречи́стая, ублажа́ют Тя, ро́ди же вси челове́ков досто́йно сла́вят; Тобо́ю бо еди́ною и́же на земли́ небе́сным совоку́пльшиися, пое́м рождество́ Твое́.

Безсме́ртному естеству́ ме́ртвенное предтече́ во святы́ню, и Де́ва Отрокови́ца безпло́тным преды́де, я́ко Бо́га ро́ждшая, Царя́ а́нгелов, к Нему́же о́нем взира́ти невозмо́жно есть.

Ве́рных Предста́тельница, стена́ неразо́рна благохва́лящих Тя, ро́ду челове́чу всему́ спаси́тельна я́вльшаяся, Бо́га ро́ждши, пло́тски прише́дшаго, ду́шу мою́ спаси́, Всенепоро́чная.

Све́тлый о́блак Тя, незаходи́мое Со́лнце нося́й, ве́дуще челове́цы, воспева́ем и любочеству́ем, Влады́чице: о́браз бо, помрачи́вшийся во Ада́ме, вообрази́ла еси́ Боже́ственными све́тлостьми.