Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную песнь пою́ща.

Пе́ти непреста́нно Тебе́ до́лжни есмы́, Чи́стая, и Твое́ предста́тельство призыва́ти всегда́, его́же низпосла́ти умилосе́рдися Твоим моли́твенником, я́ко да изба́вимся бори́теля.

Во́ду главе́ мое́й кто пода́ст, Всенепоро́чная, аще не Ты ве́ждей источиши слезы и подаси ми пла́катися о душе моея́, ю́же содеях ме́ртву прегрешеньми.

Словом от всех животных един аз почтен быв промышлением Зижди́телевым, повину́хся безу́мно, Всепе́тая, страстем душетли́тельным; сего ради уподобихся скотом безсловесным.

Ле́ствице небодо́лгая, доброде́телей путь, ду́ши вознося́щая сло́вом к небе́сным, ея́же степе́ньми восходи́ти ми сотвори́, дея́нием и виде́нием, Богора́дованная.