Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя ублажа́ем.

Бо́жия пала́то чисте́йшая, ны́не на мне ми́лости мно́гия Твоя́ удиви́, Богоро́дице Мари́е Всенепоро́чная, я́ко да велича́ю и ублажа́ю Тя, Превы́шшую небе́с и вся́кия тва́ри.

Благода́рственными гла́сы воспева́ем Тя, Тобо́ю вои́стинну обоже́ния улучи́вшии, и вопие́м: ра́дуйся, Всепе́тая; ра́дуйся, Благослове́нная; ра́дуйся, огнеобра́зный престо́ле Царя́ всех; ра́дуйся, Мари́е Влады́чице.

Пе́ти, сла́вити и блажи́ти Тебе́ пода́ждь нам досто́йно Тя чту́щим, Пренепоро́чная, и рождество́ Твое́ велича́ти, еди́на Благослове́нная; Ты бо похвала́ еси́ христиа́н и к Бо́гу Моли́твенница благоприя́тная.

Ка́пля я́коже с небесе́, на чре́во Твое́ ту́ча сни́де, и пре́лести пото́ки изсуши́вши, нетле́ние одожди́ и избавле́ние всем челове́ком Тобо́ю, Богора́дованная.

Стихиры, глас шестый. Подобны:Тридне́вен воскре́сл еси́:

Ра́дуйся, ца́рствующих, Чи́стая, дерзнове́ние непобедимое; ра́дуйся, славо честнеи́ Твоей иконе верно кла́няющихся; ра́дуйся, де́монов падение и челове́ков исправле́ние.

Ра́дуйся, спасе́ния на́шего нача́ток и корень, Всечи́стая; ра́дуйся, све́щниче, свещу́

Христа́ посреде́ стяжа́вый; ра́дуйся, и небе́с превы́шшая, Мари́е Влады́чице.

Ра́дуйся, Чи́стая, честне́йшая тва́ри всея́ ви́димыя же и у́мныя, я́ко па́че ума́ обои́х ро́ждшая Влады́ку; ра́дуйся, Богоро́дице, души́ моея́ весе́лие.

Всепе́тая, спаси́ от обдержа́щих мя лютых раба́ Твоего́, и ра́дости смире́нную ду́шу мою́, Всесвята́я, и утеше́ния испо́лни, я́ко да непреста́нно велича́ю Тя.