Ирмос: Образу злато́му на по́ле Деи́ре служи́му, трие́ Твой о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: «Благослове́н еси́, Бо́же оте́ц на́ших».

Огнем искуше́ний пали́мыя, чуде́с исто́чниче, хода́тайством Твоим ороси́ пою́щия: ра́дуйся, Одожди́вшая ми́ру во́ды спасе́ния; ра́дуйся, сла́дости раю́; ра́дуйся, ве́рных прибе́жище.

Глаго́лы, Чи́стая, е́же «ра́дуйся» Ти души́ весе́лием пою́щих, Отрокови́це Всенепоро́чная, услы́ши, вся́каго прило́га проти́вна изыма́ющи кре́постию Твое́ю, и от враг мы́сленных и чу́вственных при́сно.

Ски́ние Бо́жия, ра́дуйся, сла́ву челове́ком пове́дающая; киво́те, ра́дуйся, благода́ти, скрижа́ли нося́й; жи́зни трапе́зо, ра́дуйся, Хлеб небе́сный при́сно нам подаю́щая.

Те́мныя ересе́й стремни́ны, Де́во, изба́ви Тебе́ вопию́щия: ра́дуйся, сто́лпе о́гненный, уде́ла небе́снаго насле́дники нас покажи́, да пое́м: благослове́нна Бо́га пло́тию Ро́ждшая.