Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаряще: сла́ва си́ле Твое́й, Го́споди.

Посреде́ Бо́га и челове́ков была́ еси́, Всепе́тая, и Соде́теля отринове́нное созда́ние преесте́ственно Тому́ примири́ла еси́. Сего́ ра́ди вопие́м Ти: ра́дуйся, всем рабо́м Твоим спасе́ние возсия́вшая.

Вложи́ ра́дость многоболе́зненному моему́ се́рдцу, одоле́ну печа́льми от и́же в ми́ре за́висть се́юща, да пою́ Ти, Отрокови́це: ра́дуйся, всем рабо́м Твоим спасе́ние возсия́вшая.

Изба́ви лю́тых, обыше́дших мя, Всепе́тая, и не оставля́ющих уму́ пе́сни тка́ти Боже́ственнеи́ Твоей славе, да любовию зову́: ра́дуйся, всем рабо́м Твоим спасе́ние возсия́вшая.

Ми́лостива к нам Твоими мольба́ми соде́лай, Отрокови́це, Сы́на и Бо́га Твоего́, да изба́вимся гне́ва и ско́рби, при́сно зову́ще: ра́дуйся, всем рабо́м Твоим спасе́ние возсия́вшая.