Ирмос: Иса́йе, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́; Его́же велича́юще, Де́ву ублажа́ем.

Коле́блемый скорбьми́ и печа́леи́ мно́жеством, утверди́ ны Боже́ственным Твоим манове́нием, Мари́е Богоневе́сто, на кре́пцем терпе́ния и наде́жды Твоея́ ка́мени, да сла́вим Тя.

Превзы́де, Нескве́рная, бре́мя скорбе́й си́лу мою, и в ве́лию низвлачи́т про́пасть отча́яния,

от нея́же изба́ви мя, Влады́чице, во е́же непреста́нно велича́ти Тя.

Светоно́сная колесни́ца Емману́илева яви́лася еси́, Влады́чице Чи́стая, ве́рныя просвеща́ющи; те́мже мя озари́, ле́ности тьмо́ю ду́шу ны́не покрыва́юща и согреше́ньми погубля́юща.

Предста́тельство еси́ души́ моея́, Всечестна́я, Тобо́ю бо проти́вных сокруша́ю кре́пость, и к Тебе́ воздвиго́х чу́вствия вся и ум: спаси́, спаси́ мя, да любо́вию велича́ю Тя.

Стихиры, глас пятый. Подобны:Ра́дуйся, по́стников:

Ра́дуйся, Голуби́це слове́сная, мы́сленнаго пото́па прекраще́ние нося́щая и скве́рну грехо́в омы́вшая, еди́на Чи́стая, те́плое ми́ру очисти́лище, упова́ние непосты́дное и изве́стное заступле́ние чту́щих Тя и воспева́ющих ве́рно, и Боже́ственныя Твоея́ взыска́ющих по́мощи. Ра́дуйся, го́рних чино́в всевожделе́нное слы́шание; ра́дуйся, де́монов паде́ние; ра́дуйся, челове́ков исправле́ние; Христа́, ра́дуйся, Ма́ти, подаю́щаго ми́рови ве́лию ми́лость.

Ра́дуйся, светоно́сная Ла́стовице, от зимы́ мы́сленныя ве́сну принося́щая и бу́рю греха́ уста́вльшая, еди́на Чи́стая. Ра́дуйся, Боже́ственный покро́ве; ра́дуйся, трапе́зо, небе́сный Хлеб жи́зни в Себе́ иму́щая, Его́же наслажда́ющеся не боимся сме́рти, ниже́ умира́ем, но живе́м, я́ко рече́, Всеблагослове́нная, Содетель естества́. Его́же и нас, Твоих раб, насы́титися сподо́би и улучи́т, Дево, непреста́емаго и нетле́ннаго блаже́нства.

Ра́дуйся, Матероде́во Чи́стая, Юнице простеи́шая и нескве́рная, Тельца́ ро́ждшая та́инственнаго, Агнице чи́стая и всенепоро́чная, Се́рно, в гора́х арома́тов пасу́щаяся и пита́ема вы́ну кри́ны Божественных благода́тей и пи́щами Ду́ха, Ла́ние[59]скороше́ственная, змий мы́сленных убива́ющая и от Твоих раб дале́че сих прогоня́ющая; Христа́, ра́дуйся, Ма́ти, подаю́щаго ми́рови ве́лию ми́лость.

Уста́ви е́же на мя лю́тых волня́щееся мо́ре, Богосла́вная, всех крепча́йшее ве́рных прибе́жище, и к Божественному приста́нищу путе во́ждствуи́, Чи́стая, неключи́маго и всеокая́ннаго раба́ Твоего́, бе́здне поги́бели уже́ прибли́жшася и в дно неча́яния дости́гша. Влады́чице, не про́зри мя, зле бе́дствующа и вседу́шно взыска́юща ско́рыя Твоея́ по́мощи: на Тя бо все ча́яние мое́ возложи́х, Богоблаже́нная.