Ирмос: Всяк земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Водо́ю живо́тною бога́тно мя одари́ ми́лости Твоей, к Тебе́ бо прихожду́, озло́блен от нераде́ния моего́, и мил ся де́ю: простри́ весе́лие, да зову́: ра́дуйся, по́моще челове́ком, и при́сно велича́ю Тя.

Весь уязви́хся, всеокаянный, лежу паде́нием лю́тым от нахожде́ний врага́ льстеца́; но Ро́ждшая Жизнь ипоста́сную, ско́ро возста́ви мя, да зову́: ра́дуйся, по́моще челове́ком, и при́сно велича́ю Тя.

Прии́де на ны свет ра́зума Твоим рождество́м, и вся Боже́ственныя испо́лни прему́дрости, и у́мныя та́йны Сы́на и Бо́га Твоего́ ви́дим сказа́тельно. Те́мже и аз, Влады́чице, со все́ми поя, велича́ю Тя.

Осия́й мне ра́дости свет неизрече́нным благоутро́бием Твоим, и прогони́ вся о́блаки моего́ воздыха́ния, и и́стинное весе́лие ми возда́ждь, да ве́рою воспева́ю Боже́ственное Твое́ рождество́ и велича́ю Тя.

Стихиры, глас четвертый. Подобны:Яко до́бля в му́ченицех:

Ра́дуйся, престо́ле огнезра́чный Бо́га Вседержи́теля; ра́дуйся, Боже́ственная ста́мно, Ма́нну нося́щая; ра́дуйся, исто́чниче неисчерпа́емый, во́ды вре́яй[53]ве́рою под Твое́ заступле́ние прибега́щим, и благода́ть целе́б подава́яй неду́жным и напа́стей многоплете́нных реше́ние, Чи́стая, да́руяй.

Ра́дуйся, земли́ Основа́ние во чре́ве Твое́м нетесновме́стно Носи́вшая; ра́дуйся, лозо́ благопло́дная, Грозд прозя́бшая, ве́рным всем мсто́ спаси́тельное иска́пающ и нетле́ния сла́дость точа́щ и́же сове́том зми́евым в глубине́ преле́стнеи́ усну́вшим.

Ра́дуйся, горо́, доброде́тельми приосене́нная; ра́дуйся, пламеноно́сная клеще́, нося́щая Угль Боже́ствен, Взе́млющаго ми́ра всего́ грехи́; ра́дуйся, челове́ков Хода́таице и спасе́ния опло́т; Це́ркве Христо́вы, ра́дуйся, престо́ле солнцезрачныи Господень; ра́дуйся, Богоневестная, верных держа́во.

Мра́чными по́мыслы влеко́м и прельща́емь, удали́хся Твоего́ Сы́на, Богоневе́стная, я́коже пре́жде блу́дный, обнаже́н доброде́телей и́хже от естества́ име́х. Те́мже молю́ся: Боже́ственным обра́щши покая́нием, бога́тство восприя́ти сподо́би, е́же погуби́х.