Ирмос: Не послужи́ша тва́ри богому́дрии па́че Создавшаго, но о́гненное преще́ние му́жески попра́вше, ра́довахуся, пою́ще: «Препе́тый отцев Госпо́дь и Бог, благослове́н еси́».

Глаго́лом Твоим Боже́ственным ны́не после́дующе, блажи́м Тя, «ра́дуйся» вопию́ще, Чи́стая, Твоя́ бо вели́чия стра́нна и неизме́рна; те́мже, Влады́чице, ум наш озари́ пе́ти Тя во ве́ки.

Яко храм светови́днейший Ду́ха Бо́жия су́щи, дарова́ния подае́ши притека́ющим к Тебе́

ве́рою, Пренепоро́чная; сего́ ра́ди озари́ и мой ум пе́ти Тя во ве́ки.

Прибега́юща к щедро́там безме́рным Твоим не пре́зри, но я́ко Бо́га во пло́ти, ми́лости Бе́здну Ро́ждшая, уще́дри и испра́ви па́дшаго мя страстьми́ пе́ти Тя́ во ве́ки.

Двиза́ния ума́ моего́, я́ко упова́ние и спасе́ние ве́рных, напра́ви к Тебе́ бла́гостию Твое́ю, да почита́ю Тя и сла́влю во ве́ки.