Ирмос: Бо́жиим све́том Твоим, Бла́же, у́тренюющих Ти души любо́вию озари́, молю́ся, Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Враг мя творя́ща ви́дяй вся́кое беззако́ние, безсту́дно посмева́ется моим грехо́м; изми́ мя сего́ плене́ния, Чи́стая, и в студ обрати́ смех его́.

Спаси́ мя от страсте́й, ско́рби и вре́да противля́ющихся лука́вых, и сих изба́ви лови́тельства смире́нную мою ду́шу, да не реку́т к сему́, Чи́стая: укрепи́хомся нань.

Непра́ведныя руки́ изба́ви мя, язы́ка же льсти́ва и лю́тых усте́н, Де́во Богоневе́сто; вся́кое бо мое́ ча́яние на Тя возложи́х, да не постыжу́ся, молю́ Ти ся.

Се́рдца ми даждь сокруше́ние и сле́зныя то́ки, Отрокови́це, и ду́ха нищету́, да возрыда́ю соде́янная мно́ю зле, я́ко рыда́ний досто́йная.