Ирмос: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную песнь пою́ща.

Ду́ха Свята́го привлещи́ благода́ть прошу́ во отверзе́ние, Де́во, смире́нных моих усте́н, и пода́тися мне словесе́ дарова́нию, да Тя Сло́ва воспою́ Роди́тельницу.

Подала́ еси́ весе́лие в се́рдце мое́м, горо́ ту́чная и Боже́ственная, о́блаче, ро́су ка́плющ, па́мять Твою́, Де́во, утеше́ния и ра́дости вы́ну мя исполня́ющую.

Пия́нством сласте́й при́сно мя отемне́на и безу́мна су́ща уцелому́дри, напоивши вино́м умиле́ния, Богоро́дице: зре́лый бо нетле́ния Грозд процвела́ еси́.

Утоли́ла еси боле́зни а́довы, ро́ждши Недомышля́емаго, Отрокови́це, боле́зней кроме́; Сего́ моли́ вся́кия мя всеболе́зненныя зло́бы изба́вити.