песнь 9

Ирмос: Всяк земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Колесни́ца све́тлая Сло́ва су́щи, колесни́ца огнеобра́зная, колесни́ца многоимени́тая, невеще́ственных престо́л несравне́нная колесни́ца, колесни́ца златоплете́нна утверже́ния Боже́ственнаго, Сы́на Твоего́ колесни́цу мя покажи́ безстра́стием ума́, Богоневе́стная.

Но́вое не́бо небе́с превы́шшее пре́жде всех Сый угото́ва Тя, и от всех небе́сных сил утаи́, и снизше́д всели́ся неизрече́нно весь во утро́бу Твою, не изступи́в вои́стинну, Богоневе́сто, еди́наго Отча естества́.

Со́лнце све́тлое возлюби́, Влады́чице, Тя Нескве́рную, и уневе́сти неизрече́нным сло́вом ко оживле́нию уме́ршаго естества́; те́мже от любве́ Тя благохва́лим ве́рою и почита́ем я́ко Боже́ственнаго вину́ прича́стия.

Уста́ви, Всенепоро́чная, страсте́й молву́ от се́рдца моего́, утоли́ взыгра́ния пло́ти, ум утверди́ к зре́нию невеще́ственному, и помысло́в стремле́ния безчи́нная к безстра́стию обрати́, и бу́дущаго живота́ сподо́би.

Стихиры, глас четвертый. Подобны:Яко до́бля в му́ченицех:

Ра́дуйся, Боже́ственных сил весе́лие; ра́дуйся, апо́столов честносло́вие; ра́дуйся, му́чеников венча́ние, преподо́бных похвало́, по́стников, иера́рхов, проро́ков оглаше́ние, превы́шшая же созда́ний всех, Богоро́дице, а́нгел и челове́к многослову́щее слы́шание.

Ра́дуйся, жили́ще свято́е Влады́ки тва́ри; ра́дуйся, Богоро́дице Всенепоро́чная; всесве́тлый, ра́дуйся, све́щниче; ра́дуйся, гра́де одушевле́нный; ра́дуйся, мо́сте, ме́ртвыя к животу́ преводя́й; ра́дуйся, Чи́стая, Всесвята́я Де́во; ра́дуйся, едина земная с вышними Твоим рождество́м соедини́вшая.

Ра́дуйся, врата́ златокова́нная; ра́дуйся, престо́ле огнеобра́зный; ра́дуйся, светлопозлаще́нная Боже́ственная трапе́зо; ра́дуйся, златоплете́нный чертоже, хлами́до червленоша́рная[52]; ра́дуйся, колесни́це све́тлая; ра́дуйся, селе́ние сла́вное; ра́дуйся, хра́ме молниезра́чный; ра́дуйся, души́ моея́ благоле́пие и доброто, Дево Ма́ти Богоневе́сто.

Тмори́цею, Всенепорочная, прострохся покая́ние прегреше́нии́ моих сотвори́ти, но не оставля́ет ми злый мой обы́чаи́. Сего ра́ди Тебе́ вопию́, и припа́дая со слеза́ми, молю́ся: изми́ сего мя мучи́тельства, наставля́ющи к лу́чшим и спасе́ния придержа́щимся.