Ирмос: Пою́ Тя, слу́хом бо, Го́споди, услы́шах и ужасохся: до мене́ бо и́деши, мене́ ища́ заблу́ждшаго. Тем мно́гое Твое́ снизхожде́ние, е́же на мя, прославля́ю, Многоми́лостиве.

Вся́каго греха́ вина́ самолю́бие и сребролю́бие, и́хже от души́, Всечи́стая, возлюби́х, и вся́ко де́ло сту́дное доброхо́тно испо́лних, но поне́ в ста́рости спаси́ мя, окая́ннаго.

Оде́жды мя честна́го креще́ния совлече́ велиа́р, и о́строе, Всечи́стая, и злотя́жкое греха́ возложи́ ру́бище, его́же молю́, Де́во, мене́ совлецы́.

Мари́е, Влады́чице Богоро́дице, весе́лие мое́ и спасе́ние, на одре́ ле́ности лежа́щу ми всегда́, Боже́ственным све́том Твоим разори́ души́ смире́нныя моея́ тьмонеи́стовство.

Из еги́петския изведе́ Моисе́й рабо́ты изра́ильтян, мене́ же, Всечи́стая, кто изведе́т го́рькия рабо́ты страсте́й, а́ще не Ты к Влады́це моему́ и Сы́ну Твоему́ помо́лишися, Любоблагоутро́бная.