Ирмос: Христо́с моя́ си́ла, Бог и Госпо́дь, честна́я Це́рковь боголе́пно пое́т взыва́ющи, от смы́сла чи́ста, о Го́споде пра́зднующи.

Яко дверь, вводя́щу в Боже́ственное прише́ствие, я́ко рай Бо́жий, я́ко у́мное ме́сто свяще́ния, я́ко ве́рных прибе́жище, Де́ву вси ублажи́м.

Све́щник всесве́тлый и Боже́ственная трапе́зо, Бо́жие вмести́лище и киво́т, жезл, прозя́бнувый в ми́ре Цвет Христа́, яви́лася еси́, Матероде́во.

Разу́мно Тя ви́де в купине́ священнообразу́ему Моисе́й, Огня́ Роди́тельницу хотя́щу яви́тися та́йно, Богоро́дице Присноде́во.

Сло́во, Нескве́рная, в Тебе́ всели́ся, от без слове́сия страсте́й мир избавля́яй, Влады́чице, и Ца́рствия Небе́снаго сподобля́яй Тя воспева́ющия.