Ирмос: Иже от не су́щих вся приведы́й, Сло́вом созидаемая, соверша́емая Ду́хом, Вседержи́телю Вы́шнии́, в любви́ Твое́й утверди́ мене́.

Боже́ственная ле́ствице, ю́же ви́де Иа́ков, сме́ртныя возводя́щая к небе́сному вхо́ду, ра́дуи́ся, Всенетле́нная, злополу́чных наде́яние, покро́ве и ра́досте.

Пламеноно́сная клеще́, мы́сленный Угль содержа́щая, ра́дуйся, Безневе́стная Ма́ти огне́м Очища́ющаго грех ми́ра всего́.

Же́зле, ра́дуйся, Цвет жи́зни нетле́нный пресла́вно прозя́бшая; ра́дуйся, Всенепоро́чная; ра́дуйся, све́тлое жили́ще Госпо́дне.

Ста́мну Тя Ма́нны у́мныя све́дуще, «ра́дуйся» немо́лчно вопие́м, Пресвята́я Влады́чице; ра́дуйся, ве́рных безопа́сное огражде́ние и покро́ве.