Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя, Христе́, за́поведей Твоих утверди́, я́ко несть свят па́че Тебе́, еди́не Человеколю́бче.

Сте́чное* и́мам вои́стинну плотско́му рожде́нию моему́ е́же страсте́м покори́тися и безслове́сно тех послужи́ти дело́м, увы́ мне, окая́нному! Влады́чице всех, помози́ ми.

Еди́н у́бо день ка́юся Бо́гу, во вся же благоутро́бие Его́ прогневля́ю, безчу́вственный аз и душе́ю немилосе́рдый; но долготерпе́ти на мне Сего́ моли́, Всенепоро́чная.

Окая́нствовах лю́те и сляко́хся в коне́ц тяжча́йших зол моих бре́менми, и́мже во́лею повину́хся изде́тска, безу́мный; но не пре́зри мя, Чи́стая, в сих погубля́ема.

Те́лом, ду́хом же и душе́ю сый оскверне́н, прехожду́, окаля́я возду́х и де́лы моими зе́млю скверня́, окая́нный; но образми́ преложе́ния, Де́во, лу́чша мя сотвори́.