Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя, Христе́, за́поведей Твоих утверди́, я́ко несть свят, па́че Тебе́, еди́не Человеколю́бче.

Дверь показа́лася еси́ мы́сленная Восто́ка, с высоты́ на земли́, Де́во, я́вльшагося: Тобо́ю бо к нам Сло́во вни́де, во е́же спасти́ вся от безслове́сия, Всенепоро́чная.

Жезл, прозя́бшии́ Христа́, цвет нетле́ния и кади́льницу вси ве́мы злату́ю Тя, Чи́стая, Боже́ственнаго существа́ на объя́тиих Угль нося́щу, Богора́дованная Отрокови́це.

Спаси́тельнаго нас ра́ди Сло́ва смотре́ния, све́тлая Де́во Ма́ти, врата́ позна́на вои́стинну бысть: Ты бо ввела́ еси́ нам зарю́ у́мную Пребоже́ственнаго Божества́.

На нескве́рное не́дро Твое, я́ко дождь на руно́, сни́де Бог мой, Де́во, и ороси́л ны есть, зно́ем иста́явшия грехо́вным, росо́ю человеколю́бия и благода́ти.