Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся; к Тебе́ бо возопи́х, и услы́ши мя, Бо́же спасе́ния моего́.

Престо́л Бо́жий, херуви́мов превысоча́йш, Све́та го́рняго о́блаче, души́ моея́, Всесвята́я, очеса́ просве́ти, и от страсте́й омраче́ния се́рдце очи́сти.

Ма́ти Изба́вителя и созда́ний Цари́це, плене́нием лю́тым е́млема мя изба́ви, и Ца́рствия Сы́на Твоего́ сподо́би.

Зва́ние Твое́ вои́стинну душ очище́ние есть и помысло́в скве́рных прогна́ние, и бе́гство лука́вых духо́в, Богоро́дице Присноде́во.

Пе́сней песнь еси́ Ты, Богора́дованная Влады́чице, а́нгелов же добро́та и челове́ков назда́ние: Бо́га бо родила́ еси́ воплоще́нна и естества́ пременя́юща.

Седален, глас осьмый. Подобен:Прему́дрость и Сло́во:

Прииди́те вси язы́цы, боголе́пно Ма́терь всех Соде́теля воспоим, глаго́люще: ра́дуйся, Престо́ле огнезра́чный Влады́ки Христа́ Всецаря; ра́дуйся, едина Госпоже всея твари; ра́дуйся, Прия́телище Святы́я Тро́ицы, Отца́, Сы́на и Ду́ха, све́тлое и нескве́рное, Мариа́м богосла́внейшая. Моли́ся Твоему́ Сы́ну и Бо́гу согреше́ний оставле́ние дарова́ти прибега́ющим к Тебе́ ве́рно и любо́вию пою́щим Тя.