Ирмос: Вознесе́на Тя ви́девши Це́рковь на кресте́, Со́лнце пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

Изби́вшая вражду́ющих ми всу́е, я́ко ду́шу мою́ лю́те поя́ти тща́щихся, соблюди́ мя, Влады́чице, в Тебе́ ненаве́тна, да веселя́ся сла́влю Тя.

Избавля́ющи мя от язы́ка льстивоглаго́лива, Предста́тельнице Блага́я моя́, непреткнове́нна покажи́ от дея́ний жите́йских, мно́го бо мо́жеши, я́ко Ма́ти су́щи Творца́.

Утоля́ющую боле́зни Тя ве́дый цельбу́, вопию́ немощству́яй душе́ю и те́лом: исцели́ мя, Влады́чице, спаси́ и поми́луй к Тебе́ прибе́гша моле́бника Твоего́.

Яко похвалу́ а́нгел и челове́к воспева́ем Тя вси, Присноде́во Мари́е, и мо́лимся ве́рно: моли́ся, Влады́чице, да напа́стей изба́вимся.