Ирмос: Образ чи́стаго рождества́ Твоего́, огнепали́мая купина́ показа́ неопа́льная; и ны́не на нас напа́стей свире́пеющую угаси́ти мо́лимся пещь, да Тя, Богоро́дице, непреста́нно велича́ем.

Гора́ Бо́жия, Всесвята́я, Юже десни́ца предсоде́я Госпо́дня, в поги́бельных мя заблужда́юща гора́х, стремни́нами же и про́пастьми отрева́ема, взыска́вши, к горе́ доброде́телеи́ руково́дствуи́.

Уже́ неве́стник угото́вася и че́ртог украси́ся бра́чный, и вхо́дят с ра́достию соблюдшии́ чистоту́ нерастле́нну, аз же еди́н, Богоро́дице, во тьму оты́ду.

Зако́ны Бо́жии отверго́х и зако́ну греха́ себе порабо́тих, ума́ зако́ну не повину́выйся, окая́нный; зако́нов Утаи́вшаяся естества́ в честно́м Твоем рождестве, зако́ны пло́ти моея́ покори́.

Да глубину́ безме́рную щедро́т пока́жеши Твоея́ бла́гости и благоутро́бие Сы́на Твоего́, Всепетая, па́че всех и мне согре́шшему, проще́ние пода́ждь и рая́ жили́ще.

Стихиры, глас первый. Подобны:Прехва́льнии му́ченицы:

Ра́дуйся, гра́де одушевлен Бо́жий; ра́дуйся, Ма́ти Дево; ра́дуйся, раю́, живота́ Дре́во посреде́ прозябы́й, Христа́ Жизнода́вца и Го́спода, Его́же умоли́ ма́терними Твоими ны́не мольба́ми изба́вити от бед рабы́ Твоя́.

Ра́дуйся, покро́ве Бо́жий, горо́ неискусобра́чная, ю́же Авваку́м ви́де; ра́дуйся, многовожделе́нная добро́то, Богоро́дице; ра́дуйся, Боже́ственная трапе́зо, Хлеб Небе́сный нося́щая, Христа́ Го́спода, Его́же моли́ рабы́ Твоя́ вся́каго изба́вити озлобле́ния.

Ра́дуйся, пала́то Бо́жия Сло́ва, Всенепоро́чная, в ню́же Всели́выйся обнови́ истле́вшия вся; ра́дуйся, Клас жи́зни изра́стшая безсе́менно, Богоро́дице Всепе́тая, Его́же ны́не умоли́ препита́ти дея́ний доброде́тельных хле́бом ду́шу мою́, молю́ся.

Мно́гих обурева́ют мя лю́тых прило́зи, Богоневе́сто, ско́рби разли́чны и ра́ны, бед пучи́на ны́не покрыва́ет раба́ Твоего́, Нескве́рная, к кому́ прибе́гну, окая́нный? То́кмо к Тебе́, Благоутро́бнеи́: по ми́лости Твое́й у́бо, Влады́чице, уще́дри мя и спаси́ моле́нии Твоими.