Ирмос: Су́шу глубороди́тельную зе́млю со́лнце наше́ствова иногда́; я́ко стена́ бо, огусте́ обапо́лы вода́ лю́дем пешомореходя́щим и богоуго́дно пою́щим: «Пои́м Го́сподеви, сла́вно бо просла́вися».

Вы́шняго отпа́д и лу́чшаго жития́ и живота́ добре́йша, в преиспо́днейшее сведо́хся а́дово ме́сто, нача́льства же вся́каго и вла́сти Тобо́ю, Влады́чице, па́ки превы́шше бых, ро́ждшею Спа́са моего́.

Отверзо́шася заключе́нная врата́, Влады́чице, рая́ Еде́мля Твоими Боже́ственными враты́ одушевле́нными и живы́ми, и́миже Бог еди́н про́йде и затворе́ны оста́ви. Те́мже молю: жи́зни врата́ мне отве́рзи.

Ду́ха Всесвята́го сосу́д свят и прия́телище свяще́ннное, Богоро́дице, ду́шу мою́, лука́вых бы́вшу духо́в жили́ще, освяти́, дух прав во утро́бе мое́й ны́не обновля́ющи.

Утром покая́ния тьму разо́ршая и нощь страсте́й, ду́шу мою́, во мра́це неве́дения спя́щу, у́треневати и просвеща́тися све́том богоразу́мия воздви́гни светоза́рным моле́нием Твоим, Богома́ти.