Ирмос: Впещи́ о́троцы Изра́илевы, я́коже в горни́ле, добро́тою благоче́стия чисте́е зла́та блеща́хуся, глаго́люще: «Благослови́те, вся дела́ Госпо́дня, Го́спода, по́йте и превозноси́те во вся ве́ки».

На ка́мени поста́ви безбе́днем Бо́жия любве́ восхо́ды души́ моея́, и от страсте́й прило́га сохрани́ ю́ невла́ему[21], Богоро́дице, да тве́рдым се́рдцем воспева́ю и сла́влю Тя ве́рно во ве́ки.

Вжили́[22]мя, Влады́чице, си́лою серде́чною, кре́постию Твое́ю на стра́сти препоясу́ющи и соблюда́ющи невре́дна от сих обдержа́ния и го́рькаго мучи́тельства, да Тя сла́влю при́сно благохвале́нием.

О, Де́во, Честна́я Влады́чице, душа́ моя́ по Писа́нием вслед Тебе́ прилепи́ся[23]; сего́ ра́ди простри́ десни́цу Твою́ нескве́рную и во всех заступи́ мя, покрыва́ющи, снабдева́ющи и ра́дости ве́чныя сподобля́ющи.

Светоно́сное селе́ние Бо́жие яви́лася еси́, Богоро́дице, одушевле́нна же и чисте́йша пала́та честна́я, и престо́л огнезра́чен нестерпи́маго Бо́жия Существа́; те́мже Тя воспева́ем ве́рнии и сла́вим во ве́ки.