Ирмос: Пре́жде век от Отца́ рожде́нному нетле́нно Сы́ну, и в после́дняя от Де́вы воплоще́нному безсе́менно Христу́ Бо́гу возопии́м: вознесы́и́ рог наш, Свят еси́, Го́споди.

Вси проро́цы Тя Ма́терь Бо́жию пропове́даша о́бразы пресла́вными, и́хже мы сбытие́ зря́ще я́сно, ве́руем и про́сим улучи́ти Тобо́ю Боже́ственныя тишины́.

Яви́лася еси́ ши́ршая небе́с, заче́нши всех Бо́га, и на объя́тиих Твоих содержи́ши вся Содержа́щаго, Чи́стая. Те́мже молю́ Тя: от обдержа́щих мя лю́тых страсте́й ско́ро свободи́.

Ты су́щим в ну́ждах и в ско́рби Побо́рница еси́, Ты су́щим в бу́ри жите́йстеи́ блага́я Упра́вительница. Те́мже моля́ся вопию́ Ти: Твою́ по́мощь, Чи́стая Де́во, да́руй рабу́ Твоему́.

Влады́чице ми́ра, спасе́ние ве́рных и заступле́ние, я́же из глуби́н серде́чных стена́ния моя́ к Тебе́ возсыла́емая и сле́зы прие́мши, не пре́зри, Всенепоро́чная: согреше́ний мно́гих изба́ви мя и скорбе́й.