Ирмос: Обы́де мя бе́здна, гроб мне кит бысть, аз же возопи́х к Тебе́ Человеколю́бцу, и спасе́ мя десни́ца Твоя́, Го́споди.

Ра́дуйся, Ада́мово воста́ние и пла́ча Евина отъя́тие, Мари́е Пренепоро́чная, всеми́рная похвале; сла́во, ра́дуйся, чту́щих Тя.

Ра́дуйся, ве́рных утвержде́ние и апо́стол Боже́ственных пропове́дание, Мари́е Всепе́тая, чистоты́ сокро́вище; всех, ра́дуйся, прибе́жище раб Твоих.

Ра́дуйся, де́вственных похвало́, Де́во, све́тлая и преди́вная, ма́тереи́ све́тлость кра́сная и всечестна́я; па́дающих, ра́дуйся, гото́вейшее воста́ние.

Ра́дуйся, Боже́ственный вхо́де и́же ве́рою ве́дущим Тя, Всенепоро́чная, Бо́га Роди́тельницу, ни́щих попече́ние и злополу́чных упова́ние непосты́дное.

Седален, глас пятый. Подобен:Собезнача́льное Сло́во:

Ра́дуйся, всезлата́я ста́мно, Ма́нну небе́сную внутрь иму́щая; трапе́зо свята́я, ра́дуйся, нося́щая жи́зни Хлеб; ра́дуйся, све́щниче све́тлый; ра́дуйся, пала́то честна́я; ра́дуйся, престо́ле о́гненный Христа́ Всецаря́; ра́дуйся, Всенепоро́чная, покро́ве душ на́ших.