Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Всесвята́я Влады́чице Богома́ти, тле́ния мя изба́ви и страсте́й молву́ укроти́, Исто́чник безстра́стия ро́ждшая.

Па́че ума́ Безле́тнаго, па́че сло́ва Соде́теля, Всесвята́я, родила́ еси́, изба́вльшаго вся́кия тли я́ко Богоро́дицу Тя воспева́ющия.

Сын Собезнача́льный Отцу́, недр Оте́ческих не оста́вль, воплоти́ся, Отрокови́це, в не́дрех Твоих и Авраа́мово не́дро отве́рзе нам.

Неискусому́жно родила́ еси́, Богоро́дице, Емману́ила, смире́ние на́ше уще́дривша, те́мже при́сно по до́лгу Тя сла́вим.

Седален, глас пятый. Подобен:Собезнача́льное Сло́во:

Цвет Боже́ствен, ко́реню прозя́бшии́, киво́те, све́щниче и ста́мно всезла́та, свята́я трапе́зо, Хлеб жизни нося́щая, я́ко Сы́на Твоего́ и Бо́га, Того́ со а́нгелы умоли́ и со все́ми и́же от ве́ка святы́ми поми́ловати воспева́ющия Тя.