Ирмос: Вои́стинну Богоро́дицу Тя испове́дуем, спасе́нии Тобо́ю, Де́во Чи́стая, с безпло́тными ли́ки Тя велича́юще.

Твоя́ плаче́вныя уще́дри, Де́во, моле́бники, неудо́бства же вся́каго свободи́, наноше́ния находя́щая возвраща́ющи.

Ми́лостив бу́ди, Спа́се мой, всем чту́щим Пресла́вную вресноту́ Ма́терь Твою́, и рая́ сла́вы покажи́ я́ жи́тели.

Путь зло́бы вся́кия приле́жно теки́й, доброде́телей же путь мимотеко́х; путь скажи́ ми, Отрокови́це, во́ньже пойду́.

Песнь Ти коне́чную, пе́рвую же и сре́днюю, арха́нгельски, Чи́стая, е́же «ра́дуйся» приношу́, сообра́зныя бо Тебе́ ины́я обрести́ не моги́й.

Стихиры, глас оьмый. Подобны:О, пресла́внаго чудесе́:

Ра́дуйся, сме́рти разоре́ние; ра́дуйся, а́дово умерщвле́ние, Ада́ма воста́ние и Евы избавле́ние; ра́дуйся, му́чеников кре́посте непобеди́мая; ра́дуйся, преподо́бных ри́зо богосоде́ланная; ра́дуйся, спасе́ние ми́ра, Всенепоро́чная; ра́дуйся, ра́досте всех держи́мых скорбьми́, Де́во Ма́ти Честна́я.

Ра́дуйся, цве́те ве́ры; ра́дуйся, упова́ние челове́ков; ра́дуйся, стене́ неруши́мая; ра́дуйся, гра́де Влады́ки тва́ри одушевле́н; ма́тереи́, ра́дуйся, украше́ние и дев вселюбе́зная добро́то; ра́дуйся, всечу́дная вселе́нныя похвале́; ра́дуйся, Бо́жие нескве́рное пребыва́лище; ра́дуйся, Богоневе́сто.

Ра́дуйся, всех сказа́ние слове́с, Чи́стая Отрокови́це, вся́кия кни́ги ве́тхия же и новыя соверше́ние, сладкопе́ний сконча́ние, та́йный письме́н всех соста́в*, а́льфа, оме́га, нача́ток же и коне́ц. По Рождестве́ Твое́м Ты еси́ Влады́чица, те́мже Твое́ю си́лою пе́ния сия́ соверши́шася.

Приими́ сей труд мой ску́ден, Блага́я, егоже аз в не́мощи телесе́ принесе́х и Твое́ю любо́вию укрепля́емь, ту́ю препобеди́х; и спасе́ния мя сподо́би, Чи́стая, да коне́чную, сре́днюю же и пе́рвую песнь а́нгельскую Ти вопи́ю: ра́дуйся, Ма́ти Бо́жия.

Совершителю добрых, Богу благодать