Ирмос: Ужасо́шася вся́ческая о Боже́ственней сла́ве Твое́й: Ты бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, всем воспева́ющим Тя мир подава́ющая.

Ра́дуйся, Прозя́бшая Насади́теля тва́ри; ра́дуйся, Ро́ждшая Пита́теля всего́ ми́ра; ра́дуйся, ко́реню Дави́дов, Содержи́теля всех па́че вся́каго помышле́ния израсти́вый.

Ра́дуйся, стена́ неруши́мая и покро́ве честву́ющих Тя; ра́дуйся, земнора́дных предста́тельство и дерзнове́ние; ра́дуйся, челове́ков наде́ждо, всех весе́лие кра́сное блажа́щих Тя.

Ра́дуйся, непости́жное и а́нгелом виде́ние; ра́дуйся, несказа́нное и ди́вное чу́до; ра́дуйся, Дщи Дави́дова и Ма́ти всех Творца́, Влады́чице и Госпоже́ всея́ тва́ри.

Ра́дуйся, колесни́це огненная все́ми Ца́рствующаго; ра́дуйся, багряни́це у́мная Бога Сла́ва; ра́дуйся, клеще́ та́инственная и кади́льнице злата́я, две́ре непрохо́дная, Всеблаже́нная Влады́чице.