Ирмос: Взако́не се́ни и писа́ний о́браз ви́дим, ве́рнии: всяк му́жескии́ пол, ложесна́ разверза́я, свят Бо́гу; тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Зако́нов Твоих отверго́хся и спаси́тельныя за́поведи преступи́х, Ще́дре, и стра́шнаго бою́ся суди́ща Твоего́, в не́мже, воссе́д, суди́ти и́маши вся́ческая, те́мже вопию́: ту́не спаси́ мя, Сло́ве, Ма́тере Твоея́ мольба́ми.

Кре́посте моя́, наде́ждо и пе́ние, держа́во и спасе́ние мое́, Богоневе́сто Мари́е, ви́димых враг изба́ви и лю́тых неви́димых, и́щущих зверообра́зно мя растерза́ти и в коне́ц погуби́ти.

Житие́ мое́ все, Нескве́рная, ле́ностно со верши́х и прибли́жихся а́ду ны́не неча́яния, но исправле́ние подава́й и не оста́ви мя в сицево́м озлобле́нии, прибега́юща к покро́ву Твоему́.

Сы́на Бо́жия ро́ждши и всех су́щи Влады́чица, поми́луй ду́шу мою́, и в день суда́ осужде́ния мя изми́, и не оста́ви му́кам гее́нским отвести́ся.

Стихиры, глас третий. Подобен:Стра́стию Твое́ю, Христе́:

Ра́дуйся, разреше́ние кля́твы и ра́дости излия́ние; ра́дуйся, Еюже а́нгелом совокупи́хомся; ра́дуйся, Ма́ти Нескве́рная; ра́дуйся, ве́рных те́плое и изве́стное предста́тельство.

Ра́дуйся, све́тлая похвале́ и ве́ры воздви́жение; ра́дуйся, Еюже уз отреши́хомся, и́же дре́вле держи́мии мра́ком неве́дения, Чи́стая, и глубино́ю прегреше́ний.

Радуйся, руно Гедеоново; ра́дуйся, Божий черте́же; ра́дуйся, мы́сленный Грозд Прозя́бшая; ра́дуйся, ми́ра Влады́чице; ра́дуйся, правосла́вных утвержде́ние и похвали́.

Яко множеством напа́стей и грехов содержу́ся к заступле́нию Твоему́, Влады́чице, припа́даю окая́нный: не лиши́ мене́ прочее бога́тыя Твоея́ помощи.