Ирмос: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́; тем веселя́щеся, Тя, Богоро́дице, велича́ем.

Ты удобре́ние всех о Тебе́ хва́лящихся, Ты весе́лие ми́ра и утеше́ние раб Твоих, Ты услажде́ние и жела́ние пою́щих Тя, Ма́ти Де́во.

Воспевае́м неизрече́нную сла́ву и безприкла́дную Твою́ благода́ть: Ты бо еси́ исто́чник прему́дрости, из него́же Сло́во всем произы́де Тя чту́щим, Нескве́рная, и воспева́ющим Твое́ Рождество́.

Яви́лася еси́ херуви́м превы́шшая и ши́ршая небе́с, Непоро́чная Де́во Мари́е, Вели́каго сове́та Ангела ро́ждши, собезнача́льна Отцу́ и Ду́ху соприсносу́щна.

Всесвята́я Де́во, Влады́чице, ту́не уще́дри мя, не и́мам бо ины́я наде́жды спасе́ния, а́ще не Твое́ заступле́ние, по́мощь и покро́в Твой.

Стихиры, глас четвертый. Подобен:Свы́ше зван:

Ра́дуйся, Све́та чисте́йшаго прия́телище; ра́дуйся, сто́лпе о́гненный, у́мнаго Изра́иля внутрь в Боже́ственное поко́ище, Еди́на, вводя́й; ра́дуйся, о́блаче, вели́кое Со́лнце ми́рови озари́вый и к незаходи́мому Све́ту я́же во тьме неве́дения спя́щия приведы́й; ра́дуйся, Де́во; ра́дуйся, Всечестна́я; ра́дуйся, Ма́ти Христа́ Бо́га на́шего, Его́же моли́ спасти́ и просвети́ти ду́ши на́ша.

Ра́дуйся, све́тлое жили́ще Госпо́дне; ра́дуйся, престо́ле всезла́т; ра́дуйся, све́щниче многоце́нный; ра́дуйся, червлени́це, омочи́вшая от крове́й Тво́их багряни́цу Царю́ богоде́льную; ра́дуйся, гра́де одушевле́нный, ве́нче честны́й и держа́вное остене́ние ца́рствующих благоче́стно; ра́дуйся, непобеди́мая во́инствующих де́рзосте; ра́дуйся, две́ре Госпо́дня, Всепе́тая, Его́же моли́ спасти́ и просвети́ти ду́ши на́ша.

Ра́дуйся, хра́ме всечестне́йший Госпо́день; ра́дуйся, Боже́ственная трапе́зо, Хлеб поноси́вшая; ра́дуйся, виногра́де ненапое́н, сла́дкии́ Грозд израсти́вшая; ра́дуйся, сладча́йшее пе́ние и услажде́ние небе́сных умо́в; ра́дуйся, естества́ челове́ча цве́те красне́йший и всеблагово́нный; ра́дуйся, кри́не шафранобе́лый и сладкоуха́нный; ра́дуйся, раю́ пи́щи безсме́ртныя; ра́дуйся, ле́пото многорачи́тельная.

Испове́дую Ти, Богоро́дице Чи́стая, лю́тая моя́ согреше́ния; а́ще бо и утаю́, в день суда́ отверза́емым кни́гам вся́ко объявя́тся: о́чи оскверни́х, взира́яй безме́стная, ру́це беззако́нно окаля́х студоде́йствии, те́ло отщети́х, окая́нный, и ду́шу мою́ грехми́ уязви́х; поми́луй, уще́дри и ча́сти спаса́емых насле́дника покажи́ мя мольба́ми Твоими.